“O proxecto vitivinícola máis esperado en Galicia en 2012” ou “a unión de dous dos mellores expoñentes do viño galego”… Son algúns dos comentarios que preceden á posta en escena desta iniciativa que lle presentamos. Bodegas El Paraguas nace grazas ao encontro de dúas figuras do panorama vitivinícola galego, o consultor Felicísimo Pereira e o bodegueiro Marcial Pita. O mellor enólogo de Galicia en 2011, segundo a asociación de sumilleres Gallaecia; e o home que situou ao tinto El Linze, en só dúas colleitas, como mellor viño de España; unen as súas forzas e a súa experiencia para producir un branco único, El Paraguas Atlántico.
Un viño elaborado na D.O. Ribeiro co triunvirato de grandes uvas autóctonas galegas: a treixadura, a albariño e a godello. O novo embaixador dos brancos galegos responde a unha filosofía elaboradora na que se incorporan as últimas tecnoloxías en vinificación ao servizo de viñedos de avanzada idade, nos que a intervención de Bodegas El Paraguas é mínima e sempre ao servizo da máxima calidade dos acios.
El Paraguas Atlántico é un viño cun prezo que rolda os 15 en tendas especializadas, de limitada produción, tan só 6.000 botellas da excelente anada 2011; que pretende establecer unha nova senda vitivinícola para recuperar o esplendor que séculos atrás viviu o Ribeiro, un dos grandes viños brancos da historia mundial.